你可能會心諗點解我哋呢個地理專頁要講政治呢？其實「政治」同「地理」係好有關係㗎！眾所周知，選舉係一件非常之複雜嘅事。除咗拉票、投票之外，劃分選區都對選舉結果有好大影響。咁究竟劃分選區有咩咁巴閉，能夠左右大局呢？ 呢層就要從一個叫「傑利蠑螈（gerrymandering）」嘅政治術語講起啦！
唔好以爲我講講下政治又走去講動物喎，傑利蠑螈係一個源自美國嘅政治術語。話說喺1812年，美國麻省嘅州長Elbridge Thomas Gerry爲咗令民主共和黨獲勝，就利用重新分配選區去操控選舉結果。當時重劃嘅選區入面，有一個被劃成好似蠑螈（salamander）咁嘅奇怪形狀。於是Elbridge Thomas Gerry嘅政敵就將Gerry個名同蠑螈嘅字尾mander連埋，用gerrymandering呢個詞去影射佢以重新分配選區去操控選舉結果呢個行爲啦。
到底Gerry係點做到gerrymandering㗎呢？等我講解下啦。假設一個國家有50人（仲少過嗰d英屬避稅小島），政黨就有黃同綠兩個，支持率分別係綠黨40%同黃黨60%，總共有5個選區。相對公平嘅選區劃分方法呢，就係根據政黨支持者嘅比例去分（圖中左下）。喺呢個情況，呢個國家就會被分爲5個長條形嘅選區，綠黨就會贏得2個選區（40%），黃黨就贏3個（60%）。
有人可能會話d選區長條形好奇怪啫，如果好似圖中右下咁整齊分做5格又得唔得呢？喺呢個情況呢，由於黃黨本身有支持者數量上嘅優勢，每區嘅黃都係多過綠，所以黃黨係會大獲全勝㗎。如果弱勢嘅綠黨要贏就要用返Gerry嗰招啦（圖中右上） — 將選區分成好多不規則嘅形狀，令到大多數區嘅綠黨支持者都多過黃黨支持者，於是乎支持率只有40%嘅綠黨就贏得60%嘅選區。少數族群勝出聽落就好勵志，但喺選舉中發生就喺選舉不公啦！選舉結果不但唔可以如實反映支持者嘅比例，落敗黨嘅選民嘅政見亦都會受到忽視。
現實中嘅地方由於種種因素，例如地勢、住宅分佈、唔清楚實際支持者比例等，選區劃分幾乎冇可能做到圖中嘅完美分佈，而事實上大多數選區都係不規則嘅形狀。加上好多地方，包括香港，選舉重新劃分嘅準則都係唔太透明，政黨就更加容易從中獲利啦。喺世界各地，例如美國、愛爾蘭、馬來西亞同菲律賓等等，都有政黨利用傑利蠑螈呢個做法去鞏固自己嘅勢力嘅紀錄。
所以呢選區分配除咗要考慮人口分布外，亦都要考慮點樣先可以避免唔小心做成傑利蠑螈（unintentional gerrymandering）。學咗呢個新詞語，下次香港重新分配選區嘅時候，大家不妨留意下啦！
多謝你睇晒成篇文呀😉鍾意呢篇文嘅話，去我哋Facebook比個like支持下啦！
沒有留言:
張貼留言